رادوبيس

هتعمل ايه لو قولتلك أن سندريلا مش أصلها فرنسي و أن القصة اللي بيتم تداولها من سنين السنين أصلها مصري و مش بس اتذكرت في التراث دي كمان اتذكرت في البرديات ...

انا نورهان احمد فتحي و انهاردة هحكيلكم اصل قصة سندريلا المصري ..

     رادوبيس ( سندريلا المصرية )
بردية شيستر بيتي بردية في المتحف البريطاني اتحكى عن رادوبيس في البردية إنها بنت التاجر المصري سنفرو اللي كان راجع من رحلة تجارية و وجد زوجته مريضة جدا والكهنة مش لقيين علاج لمرضها وكانت بتمو.ت ..
أحد الكهنة بلغ والدة رادوبيس بما سيحدث بعد مو.تها وهو زواج زوجها مرة أخرى وأن رادوبيس هتبقى فاتنه و جمالها هيسبب غيرة الجميع منها  و طلبت من بنتها تتحلى بالصبر و طلبت أنها تحضرلها صندوقين خاصين جدا من الخزانة وقتها و أعطتهم لرادوبيس
الاول :- فيها قلادة ثمينه جدا مورثةمن الجدة للام و في بعض المصادر كان فيه دهب و مجوهرات ..
التاني : صندوق فخم من خشب الابنوس مطعم بالذهب و الفضة و بداخله صندل (حذاء) مصنوع من جلد الغزال ذهبي اللون مرصع بالاحجار الكريمة ومغزول من خيوط الذهب و ليس له مثيل في البلاد ..
اخدت رادوبيس الصندوقين و انبهرت جدا بالصندوق التاني و ما بداخله ..
و لكن الام قالتلها أن قيمة الحذاء ده مش في جماله ولكن في الحظ و الحدث العظيم اللي هيحصلك منه في المستقبل ..
و خلي بالك يا رادو الصندل ده مش هيجي مقاس حد غير مقاسك انتي بس ولازم تحافظي عليه و تخفيه كويس ..

وبالفعل ماتت مامت رادوبيس و زي اي راجل اصيل وفي  تزوج سنفرو بعد وفا.ه زوجته .. و أنجبت زوجته التانية بنتين أقل في الجمال من رادوبيس ..
زوجة الأب كانت ش.ر.يرة و كانت بتشتغل أن زوجها دائما في رحلات تجارية و في عمله و كانت بتذل رادوبيس تنمر بقى و تعذيب نفسي و انتي خدامة عندنا و اوعك تنسي نفسك الكلام الكتير المعروف عن زوجة الأب الش.ر.يرة  و مكنتش تاكل ولا تشرب معاهم و تنيمها ع السطح و حاجة كدة ولا الساحرة الش.ريرة المهم كل ده كان ليه لأن رادوبيس مكنتش بتقبل بالظلم و كانت دائما بتدافع عن نفسها و كانت غير راضية عن المعاملة السي.ئة اللي بتتعاملها و بدأت زوجة الأب توقع بين رادو و بين والدها لدرجة وصلت أن الأب مكنش بيصدق رادو اصلا ..
و في يوم من الايام كان الأب ك العادة في رحلاته و شغله اكتشفت زوجة الأب مكان الصندوق اللي فيه القلاده و المجوهرات .. فقررت بحيلة شيطانية أخذ الذهب و المجوهرات و تبديلهم من عند الصائغ ومجوهرات لبناتها عشان متكتشفش رادوبيس إن زوجة الام هي اللي سر.قتهم ..
واكتشف رادو السرقة و بكت من حسر.تها و لأن محدش بيصدقها حزنت و كتمت في نفسها واخدت الصندوق التاني و خبته تحت شجرة زرعتها هي و والدتها زمان جمب بركة سباحة كدة (ترعة صغننة ) وراحت تكمل الحزن في البيت بقى
قرر الملك أنه يعمل حفلة  لاختيار زوجة لبنته و طبعا السا.حرة الش.ريرة و بناتها عرفوا و قعدوا يجهزوا بقى و طبعا بنتنا رادو قاعدة بتعيط ع حيا.تها في البيت ليه عشان طنت زوجة الأب مرضيتش انها تروح الحفلة ..
و راحت في حديقة المنزل اللي في بعض الروايات قصر تغير جو كدة و افتكرت الصندل اللي مخبيها فتحت الصندوق و طلعته و قعدت تتفرج عليه وقالت لا خلاص انا اسفة يا مامتي مش قادرة اتمسك بالوصية اكتر من كدة انا هقوم اقيس الصندل ده ..
وقد كان..
قامت تغسل قدميها في البركة و قاست فردة منه و أثناء كل ده كان في نسر جعان كدة بيطير في المنطقة شاف الصندوق والصندل بيلمعوا كدة زغللو عينه مش فاهمة ليه النسر ياكل صندل بس اغلب الروايات بتقول كدة يعني امهم نزل خطف فردة الحذاء و طار ..
وهو طاير بقى نواحي قصر الملك طبول الحفلة فزعت النسر يا حرام فوقع الحذاء في ايد الأمير شاف الأمير الحذاء و قال لما الحذاء كدة امال صاحبة الحذاء شكلها ايه ياحرااااس لفولي منف بيت بيت و شبر شبر لحد ما تلاقوا صاحبة الحذاء وبعد لف و بحث طويل راحو بيت سنفروا و معرفش ليه بيت الأميرة دائما بيبقى اخر البيت في المدينة بتبقى عائشة في الصحراء دي ولا ايه معرفش المهم يعني خبطوا و طلعت زوجة الام قالتلهم عندي بنتين ممكن الحذاء يجي مقاسهم ومطلعش طبعا الأمير بقى لمح في الحديقة و احدة مبهدلة في نفسها كدة بس جميلة و جمالها خلاب اوي بتراقب الموقف كله في صمت فسأل مين الجميلة دي ردت زوجة الأب قالتله دي بنت الجنايني ..
فراح الأمير أمرها بإنها تجرب الحذاء  وبرغم أن زوجة الأب حاولت بكل الطرق أن ده ميحصلش إلا أن رادوبيس اول ماشفت الحذا صر.خت من الفرحة و قالت حذائي ورثته عن والدتي و راحت جابت الفردة التانية و قاست الاتنين قدام الأمير و حكت حكايتها كاملة و انها بنت سنفروا و الباقي كلنا عارفينه ...
القصة دي اتروت بأكتر من شكل و طريقة و اترجمت بأكتر من ترجمة لدرجة أن البعض مصدق أن رادوبيس يونانية لأن هيرودوت اتكلم عن قصة مشابهة للقصة دي و كانت البنت فيها يونانية الأصل الحكايات كانت كتير جدا عن رادوبيس منهم اللي قال إنها مصرية و منهم اللي قال لا و مش بس كدة ده استشهدوا بقصة ست الحسن و الجمال انها قريبه من سندريلا و ممكن تكون دي نسختها المعدلة من التراث الشعبي ..
إلا أن في ثوابت في كل القصص دي
1- موت الام و زواج الاب بأخرى
2- اخوات الابنه الكبرى الأقل جمالا منها
3- معاملة زوجة الأب السيئة
4- الحذاء الصندل المرصع بالذهب و المجوهرات
5- النسر
6- الأمير وزاوجة منها في النهاية
لاني أثناء البحث وجدت بعض المقالات كاتبة أن رادوبيس كانت ابنه فلاح بسيط
و البعض الاخر كاتب إنها راقصة
و الحقيقة أنا حبيت احكيلكم القصة المتعارف عليها و أوضح الثوابت في القصة اللي بتدل ع ثبوت أصلها المصري حتى لو هنحكيها بأكتر من شكل وبس كدة ..
*************النهاية***************
#الكاتبة_نورهان_احمد_فتحي
#رادوبيس
#حكاوي_نورهان
#حكاوي_رعب